archives.cotedor.fr

Archives départementales de la Côte-d'Or

Notre site internet vient d'évoluer, notamment pour rendre plus claire la présentation des résultats des recherches (toujours plus abondants à mesure que nous ajoutons de nouveaux inventaires). Il est possible que ces résultats ne soient plus cliquables sur votre écran. Pour résoudre cette difficulté, il faut taper ctrl+maj+suppr pour accéder au menu permettant de vider le cache. Pour votre téléphone, ou si cela ne fonctionne pas, il suffit, pour trouver la procédure, de rechercher "vider le cache", suivi du nom de votre navigateur, sur votre moteur de recherche favori.

Vous êtes ici : Archives départementales de la Côte-d'Or /

Document 6 - Être « fonctionnaire » à Molesme

7 H 502-01décembre 1526. - Abbaye de Molesmes

Archives départementales de la Côte-d'Or, 7 H 502

Information faicte par nous, Nicolas Javelle/ lieutenant de honorable homme et saige, maistre/ Nicole Begat, licencié en loix, juge en garde de la/ terre et seigneurie de Grancey sur Ource pour révérend/ père en Dieu, monseigneur l'abbé de Molesmes/, seigneur dudit Grancey, appellé avec nous/ honorable homme et saige Me Guy Vignier aussi/ licencié en loix, advocat du roy à Bar sur/ Seine, conseil dudit révérend et Guillaume de/ Vaulmartin, procureur d'icelluy révérend, sur ce/ que jeudi dernier, ung nommé François François outraigea/ et batit Nicolas Robert, sergent forrestier dudit seigneur et/ Sébastien Taisson, Anne sa femme, Estienne leur filz,/ Quentin Feity, Quentin Richot, Colin Taisson, Jehan/ Taisson et plusieurs autres particuliers dudit lieu,/ jusques au nombre de IIIIXX ou cent se assemblèrent,/ poursuyvèrent ledit Robert et Jehan Henry, greffier/ dudit lieu jusques au cymetière dudit lieu, leur/ feirent et deirent plusieurs excès, oprobes et injures/, les voulurent expulser hors dudit cymetière en commettant/ par ce, monopole et illicite assemblée, ladite information/ faicte ainsi que s'ensuit/ et premièrement le samedi XXIX de décembre/ mil VC XXVI audit Grancey./ [...]


7 H 502-02[...] Estienne de Lantaiges, demorant à Essoye, eagé/ d'environ XX ans, dict et deppose par serment etc/ que jeudi dernier environ deux heures après après/ midi, luy estant au lieu de Grancey, vit grand/ amas de gens devant la maison de Sébastien/ Taisson, laboureur, demorant audit lieu, au moyen de quoy/ [...]


7 H 502-03[...] se approucha et vit Nicolas Robert dit Pélisson/, sergent de monseigneur de Molesmes audit Grancey/ et garde de ses bois dudit lieu et Essoye, lequel/ tenoit ung homme prisonnier qu'il ne cognoist, sinon/ que l'on dict qu'il est de Semoustier, disant/ qu'il yroit en prison, lequel disoit par la mort dieu/ que qu'il n'y entreroit ja et voyant que ledit Nicolas/ pour le voulloir laisser aller, luy bailla ung/ grand coup de poing sur le visaige (° tellement qu'il en/ sortit du sang/ et avoit sa chemise/ désirée) et feist/ en sorte qui se eschappa et s'en courut/ en la maison dudit Sébastien Taisson en laquelle/ il print ung espieu et vint audit Nicolas, luy/ disant par la mort dieu vous en aurez, luy appointant/ ledit espieu à l'estoumac et eust outraigé/ ledit Nicolas s'il n'eust destourné le coup de son espée. Ce voyant, par luy depposant s'approcha/ près et print ledit homme au collet de sa crainte/ qu'il ne outrageast ledit Nicolas, lequel Nicolas/ empogna ledit homme, luy osta son espieu et/ le constitua prisonnier de monseigneur et le mena/ en prison. Et en le menant, oyt plusieurs personnes/ dudit Grancey estans alentour dudit Nicolas/, jusques au nombre de trente ou quarante, tant/ hommes que femmes, les noms desquels/ ne scet, sinon qui congneut ledit Sébastien/ Taisson ; auscuns desquels disoient audit/ Nicolas, et entre aultres ledit Taisson leu,/ larron, meschant homme, véroleux, que monseigneur/ ne se servoit que de meschans gens, que l'on/ le debvoit assommé et destrappé le pays/ [...]


7 H 502-04[...] de luy. Lequel Nicolas leur faisoit commander/ de par monseigneur qu'ilz eussent à luy bailler confort/ et ayde à mener en prison ledit homme/, ce qu'ilz ne voulurent faire mais cryoient tous/ auprès icelluy Nicolas, luy disant larron, meschant/ homme et aultres iniures et que l'on le debvoit/ assommer. Ce faict, se retira et peu de temps/ après, luy depposant venoit avec/ ledit Nicolas et Jehan Henry en la maison/ Jehan Morelot dudit lieu où illec survint ledit/ Sébastien Taisson qu'il deist audit Nicolas/ qui luy baillast les clefs de la prison pour aller/ parler audit homme qui demandoit confession, lequel/ luy respondit qu'il ne s'en souciast et que l'on/ yroit bien sans luy, qu'il ne le serchast plus/ et qui l'avoit assez sercher de trop près/, luy disant ledit Taisson/ qu'il estoit plus homme de bien que luy, qu'il/ estoit meschant homme et que monseigneur ne se servoit/ que de meschans gens, lequel Nicolas luy/ respondit qu'il estoit aussi homme de bien/ que luy, et plus n'en a depposé./ [...]


7 H 502-05[...] Symon Morelot demourant audit Grancey aagé d'environ XVIII ans,/ a déposé par son serement sur ce faict aux sainctz euvangilles de Dieu/ que jeudi dernier passé environ deux heures après midi, il estoit/ audit Grancey au carré de la maison de la confrairie près le/ pillory, oyt bruyt de gens devant la maison Sébastien/ Taisson, laboureur, demourant audit lieu, ou quel bruyt y alla pour/ veoir que c'estoit. Et luy illec estant, vid Nicolas Robert/ dit Pelisson, sergent de monseigneur de Grancey, qui tenoit/ prisonnier ung homme qu'il ne congnoist, lequel disoit audit/ Nicolas que par le sang dieu et la mort dieu qu'il n'yroit point/ en prison et n'estoit pas en luy de luy mener. Lequel Nicolas/ luy disoit qu'il luy meneroit, ci fust-il plus fort la/ moytié. A l'entour duquel Nicolas et prisonnier estoient/ plusieurs personnes dudit Grancey entre lesquelz estoient/ ledit Sébastien Taisson, Colin Taisson dit le petit Colin, Jehan Taisson/, Benoist Farisien, Jehan Marichault, Mougeot Lory/ et plusieurs aultres jusques au nombre d'environ L ou LX personnes/ tant hommes que femmes. Ausquelz ledit Nicolas fit commandement/ de par mondit seigneur qu'ilz eussent à luy bailler confort et ayde pour aider/ à mener ledit prisonnier es prisons de mondit seigneur. Dont luy/ fut respondu par lesdits Sébastien, Colin, Jehan Taisson et Benoist/ qu'ilz n'y entreroient ja et qu'ilz ayderoient plustost/ à le mener en prison que ledit homme. Et disoit ledit/ Sébastien aux assistants illec estant, allons tous après et/ ne le laissons point emmener en prison, les exhortant/ à grant couraige de ce faire. Toutes foiz, personne ne se/ meut à rescourir ledit prisonnier sinon ledit Sébastien et/ sa femme qui vinrent ayder, tousiours iniuriant ledit Nicolas/ l'appellant larron, meschant homme, ladre, meseau, et que/ monseigneur ne se servoit que de meschans gens et que ledit Nicolas/ estoit ou papier rouge. Nonobstant ces choses, ledit/ Nicolas l'emmena en prison. Et après que ledit Nicola l'eust/ mis es prisons, ledit depposant se trouva ou cymetière/ où illec y avoit gros nombre de gens dudit Grancey et/ entre aultres y estoient lesdits Sébastien, Anne sa femme, Estienne/ Taisson leur filz, Quentin Richot, Jehan Taisson, Quentin/ [...]


7 H 502-06[...] Fetiz dit Nemo, lesquelz adressèrent leurs parolles audit/ Nicolas furieusement, luy disant larron, meschant homme/, brigand, ladre, monseigneur ne se sert que de meschans gens, larrons et brigands et que ledit/ Nicolas estoit ung assailleur de chemins et qu'il n'oseroit/ saillir hors du cymetière et que s'ilz le tenoient ou hault/ des Crains (?) qu'ilz l'assommeroient, réitérant plusieurs fois lesdites/ parolles et que les serviteurs de mondit seigneur n'estoient que/ larrons et luy auroient larrecyner bien XIIII ou XV francs/ et faisoient tous les jours ledit Nicolas beaucoup de prinses/ de leursdites bestes, qu'ilz ne souffriroient faire et que si monseigneur/ l'entendoit, ilz ne l'entendoient pas. A quoy faisant, sourvint/ messire Gilles Thiébault vicaire dudit Grancey, estant sur ung cheval/ et venant de dehors, lequel mist pied à terre devant le/ presbitaire dudit lieu attenant dudit cymetière, vint audit/ cymetière ayant une hachette à sa saincture et se/ adressa audit Nicolas et à Jehan Henry greffier de monseigneur, leur/ disant par la vertu dieu, vous sortirez hors du cymetière/, les appellans meschans gens, excremen, et que par le sang/ dieu, ils sortiroient et qu'ilz n'estoient pas gens pour eulx/ tenir en terre saincte. Lesquels luy respondirent qu'ils/ estoient aussi gens de bien selon leur estat comme luy, ledit/ messire Gilles leur disoit que non, disant aux assistants illec/ estant qu'ils n'estoient pas gens de bien et les eust/ souffeir audit cymetière, disant oultre audit Nicolas que par le/ sang dieu qu'il sortiroit et que si ne sortoit, il estoit bien/ en luy de luy bailler d'une hachette qu'il avoit sur sa/ teste. Et lesquelz Sébastien Taisson, Jehan Taisson/ Quentin Fetiz et Quentin Richot disoient audit Nicolas que s'il se tenoit/ gueyres à Grancey, ilz le tueroient quelque part qu'ilz le/ treuveroient. Dit oultre sur ce interrogé que ledit messire Gilles/ disoit aux assistants dudit Grancey, illec assistants desdit/ Nicolas et Jehan Henry greffier, hostez, hostez ces meschans/ gens du cymetière et les mener assommer es chams/ comme bestes. Et que qui eust faict ainsi aux gens de/ monseigneur qu'il n'y eust pas tant de povreté ne de rongeryes/ audit Grancey comme il y a. Et plus n'en a depposé.


Meseau : lépreux
Rongerie : pillage


> version imprimable