1349, 26 décembre. — Collégiale de la Sainte-Chapelle

Extrait du testament d'Eudes IV, duc de Bourgogne, en faveur de la Sainte chapelle de Dijon

Archives départementales de la Côte-d'Or, G 1129

1.    Nous, Jehanz, par la grace de Dieu evesques de Chalon, et Joffroiz de Blaisey, sires de Maloilley, chevaliers, executours 
2.    dou testamant ou darniere voluntey de bone memoire monsoigneur .. Eude, jadis duc de Bourgogne, novalemant tres-
3.    passey, façons savoir a touz que nous, a la requeste et supplicacion de honorables personnes le doien et le chapitre 
4.    de la chappele monsoigneur le duc de Dyjon, havons fait traire et transcrire par Jehan Cultelier de Dyjon, clerc jurié 
5.    de la court monsoigneur le duc, coadjutour Hugues Poissenot, notaire de Dyjon, plusours clauses contenues oudit 
6.    testamant, faites et entreprises au proffit desdiz doien et chapitre et de ladite chappele, li quelx testamanz est scellez 
7.    dou grant seaul doudit monsoigneur le duc et des seaulx de reverent pere en Dieu monsoigneur l'evesque d'Ostun et de 
8.    honorables persones les abbez des monasteres de Saint Estiene de Dyjon, de Oigney, de Fontenoy, de Chatoillon, de 
9.    Saint Ceigne, et dou priour de Saint Symphorien d'Ostun, des quelx clauses li tenours s'ansuit .. Item nous do-
10.    nons et laissons a notre chappele de Dyjon quarante livrées de terre amourties a touz jours, por faire notre anniversaire 
11.    chascun an en notre dite chappele, le jour de notre obit, les queles seront prises et recehues surs nos maiz de Dyjon 
12.    jusques a tant que notre hoir lour hait acquis autant de terre autre part. Item nous ordenons et volons que des rantes, yssu-
13.    es et emolumanz de notre prevostey de Dyjon soient tout premierement prises, levées et recehues chascun an trois cenz 
14.    libres tournois et converties par nos executours en l'ovraige de notre dite chappele de Dyjon, jusques a tant que ladite cha-
15.    pele soit faite, parfaite et acomplie entieremant bien et covenanblement. Encor laissons nous a notre dite cha-
16.    pele de Dyjon notre petite croix d'our et la milleur de nos chappeles, toute antiere, que nous haurons ou 
17.    temps de notre deces. Item encore plusours autres clauses, lesqueles lidiz messires li dux ordene en sondit testammant 
18.    par acomplir la voluntey de son frere notresoigneur le duc Hugue, cuy Deux pardoint, est contenue la clause qui s'ansuit : Item 
19.    en acomplissant la voluntey de notredit frere, nous donons et laissons a notredite chappele de Dyjon dex livrées 
20.    de terre tournois d'annuel et perpetuel rante qui lour seront assises par nos executours por faire chascun an a touz jours 
21.    un anniversaire por l'ame de notredit frere et de ses successours. Item donons et laissons, item donons et laissons (sic) es povres 
22.    et miseraubles persones qui seront presenz en notredite chappele quant l'on fera anniversaire de notredit frere, dex 
23.    livrées de terre a touz jours qui seront assises par nosdiz executours et distribuées esdites persones par la mains dou 
24.    dyen de la chappele, et est notre antante que touz les lais et dons que nous havons faiz es eglises dessusdites, excep-
25.    tey es ordres mandianz, soient achetées rantes por faire notre anniversaire chascun an, le jour de notre obit, es-
26.    dites eglises, si comme bon samblera a nosdiz executours, lesqueles rantes nous volons estre amourties et 
27.    amourtissons doisjay. Item nous volons et ordenons que les lais que nous havons faiz a perpetuitey soient assig-
28.    nez et paiez chascun an surs nos rantes des leux au plux pres, c'est asavoir dex livrées de terre par cent 
29.    libres, dou plux le plux et dou moins le moins. Item en la fin dou testamant dessusdit est contenue li clause 
30.    qui s'ansuit : Item comme nous haiens donney et laissié en notre present testamant apres notre deces a notre cha-
31.    pele de Dyjon notre petite croix d'our, nous ladite donation et lais rappelons, et en leu d'icele donati-
32.    on et lais, nous donons et laissons a notredite chappele apres notre deces notre grant ymaige de Notre Dame d'argent. 
33.    En tesmoignage de la quel chouse nous, li devant diz executours, ces presentes lettres contenanz le transcript de mot 
34.    a mot des clauses dessusdites contenues oudit testamant havons fait sceller de nos seaulx, ensamble le 
35.    seaul de la court monsoigneur le duc mis en ces presentes lettres, et je, li devant diz Jehanz Culteliers, juriez de 
36.    ladite court et coadjutours dou notaire devant dit, qui ledit testamant hay vehu et tenu, sain et antier, sc-
37.    elley des seaulx que dessus, contenant les clauses desqueles li tenours de mot a mot est dessus transcripte et 
38.    qui surs ce hay estey requis, ha obtenu le seaul de la dite court de monsoigneur le duc, ensamble les seaulx de mes-
39.    diz soigneurs les executours devant diz estre mis en ces presentes lettres, en tesmoignage de veritey. Ce est fait 
40.    et doney le XXVIme jour dou mois de decembre, l'an de grace mil CCC quarante et nuef. Presenz 
41.    Jehan Datey, clerc, et Jaquet de Tarsuy, lais, tesmoins a ce requis et appelez.

> version imprimable