1419, 16 octobre
Lettre écrite par les maîtres de l’Université de Paris à la duchesse Marguerite, veuve du duc Jean sans Peur tué quelques semaines plus tôt, pour lui témoigner leur douleur et leur fidélité.

Archives départementales de la Côte-d’Or, B 310

Très haulte et excellent dame, nous avons receu voz piteuses et douloureuses lettres escriptes le VIIe jour d’octobre et nulles aultres / contenans le très horrible et detestable meurtre perpetré et commis en la personne de feu très hault et puissant prince le duc de Bourgogne / conte de Flandres, d’Artois et de Bourgogne, votre très cher et très amé seigneur et espous et notre singulier deffenseur et protecteur, a / qui Dieu par sa sainte grace face doulce mercy a l’ame ; dont nous sommes tant dolens et marris que plus ne povons estre, ne / plus grant tristece ne nous povoit en ce monde venir que d’avoir perdu par si faulse et mauvaise traison le prince de ce siecle / lequel, apres le roy notre souverain seigneur, tous les temps de sa vie plus nous a et cheris et amez, qui tousjours s’est traveillé de / nous garder, secourir et maintenir en noz libertés et franchises, en qui principalment avions ferme esperance d’avoir paix a la / tuicion⁽¹⁾ et conservacion de ce royaume. Sy⁽²⁾ en devons bien avoir doulour et desplaisance et non pas nous tant seulement maiz ung / chascun qui ayme le bien et l’onneur du roy et de la seignourie, maiz, très noble et puissant dame il n’est pas temps de plaintes, de / lermes ne de pleurs, ancois est besoing de labourer, traveillier et pener a la reparation du très enorme et cruel meurtre a la / quelle tout preud’omme⁽³⁾ se doit emploier de tout son cuer et toute sa puissance et resister a la mauvaise et dampnalle entreprise / des crueulx et desloiaulx murtriers. Et quant est de nous, très excellent dame, nous sommes en ferme propos et volenté de / poursuir la reparation dudit meurtre, de y labourer et traveillier en toutes les manieres que faire le pourrons selon notre / estat et profession, soit en predications, en lettres missives a notre saint pere le pape, au saint college des cardinaulx, a roys, a ducz, a princes, estudes ou communautés et, a brief, dire en toutes les manieres que on pourra penser et adviser estre / proffitables au bien et a l’onneur du roy, de son royaume, de vous et de la cause. Et telle a esté notre deliberation prinse d’un commun / accord et consentement sans ce que aucun de nous y contredeist. Sy en ferons tant au plaisir de notre seigneur que le roy, vous, votre / filz, voz parens et amis et tous preud’ommes en serront bien contens. Très haulte et puissant dame, nous nous recommandons / a vous tant humblement que faire le povons et vous supplions très affectueusement que vous nous ayez tousjours pour recommandés, / et que envers vous et votre très cher et très amé filz trouvons telle grace et amour comme avons tousjours fait envers feu notre très cher et très amé / seigneur votre dit seigneur et espous ; et nous mandés et commandés tous voz bons plaisirs et nous les acomplirons de tout notre povoir / a la voulenté du roy, de vous et de tous voz bienveillans. Le benoist saint esperit vous donit bonne vie et longue et acomplissement / de tous voz bons desirs. Escript a Paris en notre congregation generale solennelment celebree a saint Maturin le XVIe jour d’octobre.
Voz humbles et bienveillans les recteur
Docteurs et maitres de l’université de Paris

(1) Sûreté
(2) Ainsi
(3) Honnête homme

> version imprimable