22 mai 1573. – Chambre des comptes de Dijon
Cession d’une terre à un marchand de Blanzy

Archives départementales de la Côte-d'Or, B 11713

En nom de nostre seigneur amen, l’an de la circoncision d’icelluy/ courant mil cinq cens soixante treize, le vingt deuxiesme/ jour du moys de may, nous, Françoys de Torcy, seigneur/ dudit lieu, d’Ocle et Reullon, Chaulvery en l’Auxoys, savoir/ faisons à tous présens et advenir que nostre libéralle volonté/ et comme ainsy nous plaist, avons donné, ceddé, transporté et/ délivré, et par l’octroy de ces présentes donnons, ceddons/, transportons et délivrons pour nous, noz hoirs et ayans/ cause en ladite terre, justice et seigneurie d’Ocle, et/ à tiltre de nouveau baill, rante et cense pourtant loudz/, retenue et remuage et aultres droitz seigneuriaux à/ honnorable Claude Mareschal marchant de la paroisse/ de Blanzy, présent, stipulant, acceptant et retenant audit/ tiltre et soubz les conditions cy apprez désignées pour/ luy et ses successeurs les héritages suyvantz, assavoir/ un chastz de maison consistant en une chambre basse/, ung sellier et lannau dessus avec une appendise à présent/ bouchée de pallis, assize audit village de Blanzy tenant/ ladite maison de soleil levant et morvange au sentier/ tendant dudit lieu de Blanzy au village de La Chassaigne/, de midy à ung aultre chemin tendant dudit lieu de Blanzy/ au village d’Estiveau et de soleil couchant à la maison/ et en la court d’iceulx où de présent fait ledit Mareschal/ sa résidance aquize de feu Anthoine de La Barre, escuyer/. Item ung jardin et terre chanevière joignant ensemble audit/ finage de Blanzy quy fust à feu Pierre Jandreau dudit lieu/ [...]

[...] ainsy que lesditz jardin et chanevière s’estendent et comportent/ tendant de soleil levant, morvange et midy audit Mareschal/ et de soleil couchant à Anthoinette de Chemard femme de/ Anthoine Bourgeois. Item une pièce de terre à soigle/ assize audit finage de Blanzy appellée le champ Marceau/ contenant environ troys boissellées tendant de soleil/ levant à la rue au Fèvre, de midy et soleil couchant à/ Jehan Poysot et à Emilland Poysot et de morvange à/ Claude Nazaire, une boucheure visve entre d’eulx, saufz/ ausditz héritages leurs aultres meilleurs et plus vrays/ confins, fondz, treffondz, entrées, yssues, droitz, aysances/ et appertenances quelconques, desquelz, soubz les/ réserves cy apprez escriptes, nous, ledit seigneur d’Ocle/ nous devestons et dessaisissons à perpétuité pour nous/ et noz successeurs, et ledit Mareschal ses hoirs/ et ayans cause en investons et saysissons et dez maintenant/ luy en donnons et transferons la vraye propriété/, possession, jouyssance et saysine de quelque entremise/ que y puissons faire cy apprès nous entendons pour/ y aquérir aulcun droict général, particulier ny aultre/ propriétaire ny possessoire au préjudice de présent/ bail, mais promettons conduire et garantir lesditz/ héritages francz, quittes, exemptz et deschargez du lien/ et servitude de mainmorte, aussy de toutes aultres/ charges des ypothèques et prestations quelconques/ en nous payant et à noz successeurs sieurs dudit/ [...]

[...] lieu et chastel d’Ocle, chacun an, perpétuellement au terme/ de feste saint Martin d’hyver par ledit Mareschal/ et ceulx qui auront droict et cause de luy à l’advenir cinq solz tournois de rante et quatre blans vaillans/ vingt deniers tournois de cense pourtant comme dessus loudz,/ retenue, remuage et tous aultres droitz seigneuriaulx/ sans estre tenu à aulcune esmande au deffault de/ payement d’icelle cense audit terme. Et où il se trouveroit/ du charbon ou ouaille dans ledit champ Marceau, nous/ nous sommes réservez par exprez la tierce partye de/ la traicte dudit charbon, fruitz, proffitz, revenuz et/ esmollument dudit charbon sans estre tenu à aulcuns/ frais pour le regard d’icelle traicte mais seront entretenus/ faitz et supportez par ledit Mareschal et sesditz hoirs/ en tant qu’ilz en tireront dans ledit champ Marceau/ et non aultrement. Et pour ledit bail, ledit Mareschal/ nous a payé contant en présence des notaire et/ tesmoingtz soubscriptz la somme de soixante frans/ monnoye courant et trois moutons à layne avant/ la réception de ceste dont nous l’avons quitté et/ nous en tenons pour contantz, bien payés et satisfait d’icelle somme de soixante frans et moutons,/ et quittons perpétuellement ledit Mareschal et les/ siens lesditz cinq solz rante divisez en la forme/ suyvante, assavoir sur ladite mayson, jardin et/ [...]

[...] terre chanevière quatre blans de rante et ung carolus/ de cense. Et sur ledit champ St Marceau deux/ gros aussy de rante et ung autre carollus de/ cense pourtant lesditz droitz seigneuriaulx revenant/ icelle rante et cense à ladite somme de quatre/ gros pour ung checun an dont nous, lesdites/ partyes sommes contantes, promettans nous/ ledit seigneur par noz foy et serement et soubz/ l’obligation de noz biens que nous avons/ soubzmis et obligé aux cours du Roy nostre/ sire et de la chancellerye de son duché/ de Bourgougne avoir et tenir perpétuellement/ ledit présent traicté ferme, stable et agréable/ sans y contravenir et ledit Mareschal/ soubz mesme submission de payer checun/ an lesditz cinq solz de rante et quatre blans/ de cense audit terme perpétuellement sans/ cesser ny discontinuer, aussy de maintenir/ et entretenir les susditz héritages pour l’asseurance/ du payement annuel et perpétuel d’icelle rante/ et cense à peyne de tous intérestz, en/ renonsant à toutes choses contraires à/ [...]

[...] cesdites présentes que furent faictes et/ passées audit lieu de Blanzy par devant/ Jehan Desclaux, notaire royal, fermier/ du tabellion de Montcenis, juré desdites/ cours es présences de honnorable Anthoine/ Rollot, clerc, et Pierre Boussin de ladite/ peroisse de Blanzy, tesmoingtz requis/ signé F. de Torcy, Mareschal et A. Rollot./ Desclaux/.
Copie extraicte sur l’original pour/ les héritiers dudit Mareschal le XIIe/ d’apvril mil cinq cens quattre/ vingtz six, l’original remis es mains/ de honorable Nicaize Barthomyer./
Coppié et collationné à l’original par moy, soubsigné greffier/ pour sa Majesté en la chambre des Comptes à Dijon et/ ce fait, ledit original rendu./ Arviset./

loudz : lods (droit de)
morvange : vent d’ouest et par extension coteau boisé du Morvan
boucheure : clôture, haie (= boucheture)
chatz : = chas, portion de grange ou de hangar délimitée par des fermes
pallis : mur, muraille ou clôture de pieux
remuage : droit de mutation.

> version imprimable