novembre 1286. – Abbaye de Molesmes
Lambert dit Bodins et sa femme font don de leur biens à l’abbaye de Molesme 

Archives départementales de la Côte-d'Or, 7 H 735

A touz ces qui verront et orront ces présentes lettres, frères droués, abbés et touz li couvenz de l’eiglise de Moloimes, salut en notre seigneur, saichent/
tuit que cum Lamberz diz Bodins de Ricé et Margueire sa famme aient donné, quicté et outroié en pure aumone à nos et à notre esglise de Mo-/
loimes lour maison qui fu Garchom, une grange lour devant leu four, lour maison selonc Robert Saussier, lour grange dou pont, lour grant/
maison neuve, lour vigne de Vaulongrand, lour vigne qui fu Galam en Chanses, lour vigne quandit rotie, lour grant vigne de Chanses/,
lour vigne des Crees, lour vigne dou Chatele, lour vigne de la Noie Boissellainge, lour pré de la Cortainne, lour pré dou Brinant, tele/ 
partie cum il ont au pré avec les malades, leu quart de demie seyée avec Sauget, une seyée dou pré Boton, lour pré dessus la Folie, lour lonne/ 
selonc leu molim, la terre derrière la maison neuve, lour meis devant leu molim, lour meis qui est en Auterive et nos aient quicté/ 
touz les harietaiges qui movoient de notre esglise et que nos lour avoiens donnez à lour vies et avec tout ceu il nos aient donné/ 
et quicté, touz lour autres biens meubles et non meubles queconque il soient et en queconque leu il fuent. Des quelx chouses, harietaiges/ 
et meubles il se sunt ja desvectuz et en ont revectu frère Pierre Moinne, notre chamberier en nom de nos et de notre esglise de Moloi-/
mes. Nos, pour la grant affection et la grant devocion que li diz Lamberz et sa famme ont ades heue et ancor ont à notre esglise, les a/
compaignons et façons participans de touz les biens qui seront faiz deci en avant en orasons et en aumones en notre esglise et es membres/ 
de celi et lour prometons à un chascun d’aux autant de servise après lour décès comme à l’un de noz frères, et en récompansacion/ 
dou don devant dit fait à nos, nos donons et outroions au devant dit Lambert et à Margueire sa famme tant qu’il vivront chascum/ 
an dix muix de vin bon et souffisant à la mesure de Moloimes et prévande de pain conventual chascun jour pour un chascum/ 
et prévande de pain à converse chasun jour pour lour beasse et vint et cinc soz tornois chascun an pour un porc vif et toutes les/ 
semaines quand maingera char, doux fromaige prévandaux, et en la karoime et ans avanz chascun jour quatre arans ou doux generaux/ 
tex cum li couvenz aura, et chascun am un bichet de pois et un bichet de fèves à la mesure de Moloimes. Et chascune semaine/ 
une charreté de buiche et doux soz tornois por pictance à paier à aux leu diemonge, et chascun am doues paires de bones robes soufisantes/ 
à aux tant qu’il vivront ansamble, et l’um daux mort, cil qui sorevivra aura soulemant la moitié de toutes ces chouses devant dites, fors/ 
que tant qu’il aura prévande de pain à  converse avec la soue prévande de pain conventual por sa beasse. C’est à savoir cils deux qui sorevivra aura sa single/ prévande de pain conventual et prévande de pain à converse per sa beasse, cinc muix de vin chascun am, en la quinzaine une charreté de buiche, chascune/ semaine douze deniers et un fromaige prévandau ou chascun jour tel généraul comme li couvenz aura chascun am un metion de pois et un/ 
de fèves et douze soz et six deniers pour un porc. Et aux morz, nos et notre esglises seront quicte et assos de ce dom devant dit/ 
fait audiz Lambert et Margueire sa famme à lour vies si cum il est dessus dit. Et toutes ces chouses devandites si cum elles sont ci dessus/ 
escrites et devisées mot à mot, nos lour promettons à tenir et à garder fermemant sans corrumpre et sanz aler ancontre en tout am partie/ 
de queque chouse que ce soit. Et pour ceu que ceu soit chouse ferme et estanble, nos, abbés et li couvenz de Meloimes devant dit avons/ 
mis noz seaux en ces lettres que furant faites l’am notre seignour mil doux cenz quatre vinz et six, leu sambadi après les hui-/
tannes de la tout sainz et les avons bailiés et délivrés au commandemant dou dit Lambert et sa famme saelées de noz seaux/.

> version imprimable